បើមិនចង់វិនាសខ្លួនទេ កុំសេពគប់​ជាមួយមនុស្ស ៦​ ប្រភេទនេះ

,

សួស្ដី​ប្រិយមិត្ត​ទាំង​អស់​គ្នា ថ្ងៃ​នេះ​យើងមាន​អត្ថបទ​ដ៏​ល្អ​មួយ​ពាក់ព័ន្ធ​ជាមួយ​នឹង​ការ​សេពគប់​ និង​របៀប​ត្រួត​ពិនិត្យ​មនុស្ស​ចំនួន ៧​ប្រភេទ​ដែល​ប្រិយមិត្ត​គួរ​តែ​ព្យាយាម​នៅ​អោយ​ឆ្ងាយ ហើយ​កាត់​បន្ថយ​ការ​ចំណាយ​ពេល​ជាមួយ​នឹង​ពួក​គេ ប្រសិន​បើ​ប្រិយមិត្ត​ចង់​ទទួល​បាន​នូវ​ភាព​ជោគជ័យ នៅ​ក្នុង​ជីវិត​។

ចំពោះ​មូល​ហេតុ​ដែល​យើង​ គប្បី​ជៀសវាង​ការ​សេពគប់​ជាមួយ​នឹង​មនុស្ស​ប្រភេទ​ទាំង​អស់​នេះ​ គឺ​ដោយ​សារ​តែ​ពួក​គេ​នឹង​ធ្វើ​អោយ​ប៉ះពាល់​ យ៉ាង​ខ្លាំង​ដល់​អារម្មណ៍ ផ្លូវ​ចិត្ត ហើយ​និង​ផ្នត់​គំនិត​របស់​យើង។ ហើយ​ប្រសិន​បើ​ប្រិយមិត្ត​ គឺ​ជា​មនុស្ស​ដែល​ចង់​ទទួល​បាន​ភាព​ជោគជ័យ និង​សុភមង្គល​ នៅ​ក្នុង​ជីវិត​រស់​នៅ​របស់​ខ្លួន ប្រិយមិត្ត​គួរ​តែ​ធ្វើ​ការ​សម្រេច​ចិត្ត​ជា​ដាច់​ខាត ក្នុង​ការ​ជៀស​វាង​សេពគប់​មនុស្ស​ប្រភេទ​ទាំង​អស់​នេះ។

ដូច្នេះ ប្រសិន​បើ​ប្រិយមិត្ត​បាន​ត្រៀម​ខ្លួន​រួច​រាល់​ហើយ​នោះ មក​តាម​ដាន​ទាំង​អស់​គ្នា​នូវ "មនុស្ស​អវិជ្ជមាន ៧​ប្រភេទ ដែល​ប្រិយមិត្ត​ដាច់​ខាត​ គួរ​តែ​ជៀសវាង​សេពគប់​ជាមួយ" ខាង​ក្រោម៖

១) មនុស្ស​ចូល​ចិត្ត​និយាយ​ដើមគេ

ដោយ​មិន​ចាំ​បាច់​ និយាយ​រៀប​រាប់​ច្រើន មនុស្ស​ប្រភេទ​នេះ​ ប្រហែល​ជា​មាន​ប្រិយមិត្ត​ខ្លះ​បាន​ដឹង​ហើយ​ថា ពួក​គេ​ចូល​ចិត្ត​បំផុត គឺ​យក​រឿង​របស់​អ្នក​ដទៃ​មក​ជជែក​វែកញែក ហើយ​ធ្វើ​ការ​រិះគន់ និង​ទិះទៀន នៅ​ពី​ក្រោយ​ខ្នង​ ដោយ​មិន​អោយ​អ្នក​នោះ​ដឹង​ខ្លួន។ ចំណុច​សំខាន់​មួយ​ដែល​ប្រិយមិត្ត​ គួរ​តែ​ដឹង​នោះ​គឺ បើ​សិន​ជា​មនុស្ស​ប្រភេទ​នេះ​យក​រឿង​រ៉ាវ​អាថ៍​កំបាំង របស់​អ្នក​ដទៃ​មក​ប្រាប់​ដល់​ប្រិយមិត្ត តើ​ប្រិយមិត្ត​ហ៊ាន​ប្រាកដ​នៅ​ក្នុង​ចិត្ត​ដែរ​ទេ ថា​ពួក​គេ​នឹង​មិន​យក​រឿង​អាថ៍កំបាំង​របស់​ប្រិយមិត្ត​ ទៅ​វែកញែក​ប្រាប់​អ្នក​ដទៃ​ផ្សេង​ទៀត​ដែរ​នោះ?

ប្រសិន​បើ​ប្រិយមិត្ត​ បាន​ពិនិត្យ​ឃើញ​ថា​ខ្លួន​កំពុង​តែ​ស្ថិត​នៅ​ក្នុង​កិច្ចសន្ទនា​មួយ ដែល​មនុស្ស​នៅ​ក្នុង​ក្រុម​សន្ទនា​នេះ ចាប់​ផ្ដើម​និយាយ​ដើម ហើយ​វាយ​ប្រហារ​នរណា​ម្នាក់​ដែល​គ្មាន​វត្តមាន​នៅ​ទី​នេះ​ហើយ​នោះ ប្រិយមិត្ត​គួរ​តែ​ព្យាយាម​ធ្វើ​ការ​ហាម​ឃាត់​ពួក​គេ ហើយ​ប្រសិន​បើ​ពួក​គេ​មិន​យក​ចិត្ត​ទុកដាក់ ​នឹង​ការ​ហាម​ឃាត់​របស់​ប្រិយមិត្ត​ទេ ប្រិយមិត្ត​អាច​ដើរ​ចេញ​ពី​កិច្ចសន្ទនា ដែល​ឥតប្រយោជន៍​ និង​មិន​បាន​ផ្ដល់​ជា​តម្លៃ​មួយ​នេះ​បាន។

ត្រូវ​ចាំ​ថា​មនុស្ស​ដែល​ចូល​ចិត្ត​និយាយ​ដើម​អ្នក​ដទៃ ចូល​ចិត្ត​ចាប់​ផ្ដើម​ដោយ​ការ​និយាយ​ដល់​ឈ្មោះ​មនុស្ស​ដែល​ពួក​គេ​ស្គាល់ (អាច​ជា​មិត្ត​ភក្ដ អ្នក​រួម​ការ​ងារ​ ឬ​ថ្នាក់​ដឹក​នាំ​ ដែល​រូប​អ្នក​ក៏​បាន​ស្គាល់​ដែរ) ហើយ​ចាប់​ផ្ដើម​បន្ថែម​នូវ ចំណុច​អវិជ្ជមាន​ចូល​ទៅ​ក្នុង​នោះ។ អ្វី​ដែល​អ្នក​អាច​ធ្វើ​បាន គឺ​ប្រាប់​អោយ​ពួក​គេ​ឈប់​ ពីព្រោះ​អ្នក​មិន​ចង់​ចំណាយ​ពេល​ស្ដាប់​រឿង​ទាំង​នេះ​នោះ​ទេ។ ប្រសិន​បើ​អ្នក​គឺ​កំពុង​តែ​ស្ថិត​ក្នុង​កិច្ច​សន្ទនា ដែល​មាន​មនុស្ស​ច្រើន អ្នក​អាច​ចាក​ចេញ​ពី​កិច្ច​សន្ទនា​នេះ ហើយ​ត្រលប់​ទៅ​ធ្វើ​កិច្ចការ​ដែល​ផ្ដល់​ជា​ប្រយោជន៍​ សម្រាប់​អ្នក​វិញ​ទើប​ជា​ការ​ប្រសើរ។ ពីព្រោះ​ថា​ប្រសិន​បើ​អ្នក​នៅ​តែ​បន្ត​ធ្វើ​ការ​សន្ទនា​ជាមួយ​នឹង​ពួក​គេ លទ្ធផល​បន្ទាប់​នោះ​គឺ អ្នក​ប្រហែល​ជា​នឹង​យក​រឿង​អាថ៍កំបាំង​មួយ​នេះ ទៅ​និយាយ​បន្ត​ដល់​អ្នក​ដទៃ ឬ​អ្នក​អាច​មាន​អារម្មណ៍​មិន​ល្អ​ជាមួយ​នឹង​មនុស្ស​ដែល​ ត្រូវ​បាន​គេ​និយាយ​ដើម​នោះ ទាំង​ដែល​ពី​មុន​មក អ្នក​ទាំង​ពីរ​គឺ​គ្មាន​បញ្ហា​ជាមួយ​នឹង​គ្នា​សោះ។

ជា​ដំណោះ​ស្រាយ​ដែល​ល្អ​បំផុត ប្រិយមិត្ត​គួរ​តែ​ព្យាយាម​ធ្វើ​ការ​ពន្យល់​ប្រាប់​ដល់​មនុស្ស​ ដែល​ចូល​ចិត្ត​និយាយ​ដើម​អ្នក​ដទៃ​នោះ​ថា ការ​និយាយ​ដើម និង​រិះគន់​អ្នក​ដទៃ​ពី​ក្រោយ​ខ្នង គឺ​ជា​រឿង​ដែល​មិន​ល្អ​ទាល់​តែ​សោះ ហើយ​វា​ពិត​ជា​មិន​អាច​ជួយ​អ្វី​ដល់​នរណា​ម្នាក់​បាន​ឡើយ សូម្បី​តែ​មនុស្ស​ដែល​ត្រូវ​បាន​ពួក​គេ​លើក​យក​មក​និយាយ​នោះ​ក៏​ដោយ។

២) មនុស្ស​​ពូកែ​ច្រណែន​អ្នក​ដទៃ

មនុស្ស​មួយ​ប្រភេទ​នេះ គឺ​ជា​មនុស្ស​ដែល​ចូល​ចិត្ត ធ្វើ​ការ​រារាំង និង​ធ្វើ​ការ​រិះគន់​នូវ​រាល់​គំនិត​ដែល​អ្នក​លើក​ឡើង​មក​និយាយ។​ តាម​ពិត​ទៅ​មនុស្ស​ប្រភេទ​នេះ គឺ​មាន​អារម្មណ៍​ល្អ ហើយ​ចូល​ចិត្ត​អ្នក​ទៅ​វិញ​ទេ គ្រាន់​តែ​ពួក​គេ​មិន​បាន​ដឹង​ថា ត្រូវ​បញ្ចេញ​អារម្មណ៍​នោះ មក​ខាង​ក្រៅ​តាម​របៀប​ណា​តែ​ប៉ុណ្ណោះ។

មនុស្ស​ដែល​ច្រណែន​នឹង​អ្នក​ភាគ​ច្រើន គឺ​ចូល​ចិត្ត​បន្ទាប​តម្លៃ​របស់​អ្នក ដោយ​និយាយ​ថា​អ្នក​មិន​សាកសម អ្នក​ជាមនុស្ស​បាន​តែ​មាត់ ឬ​ល្អ​មិន​ទាន់​គ្រប់​គ្រាន់។ល។ ប៉ុន្តែ​អ្វី​ដែល​អ្នក​គួរ​តែ​យល់​នោះ​គឺ តាម​ពិត​ទៅ​ មនុស្ស​ប្រភេទ​នេះ​គឺ​គ្រាន់​តែ​ចង់​ជួយ​អ្នក​តែ​ប៉ុណ្ណោះ។ សម្រាប់​ខ្លួន​របស់​ ចំណេះ ផ្ទាល់​គឺ​តែង​តែ​គិត​ថា ពាក្យ​សំដី​រិះគន់ និង​ការ​ទិះទៀន​ទាំង​អស់​នោះ គឺ​ជា​កម្លាំង​ជម្រុញ​ទឹកចិត្ត​មួយ​ប្រភេទ ហើយ​ធ្វើ​អោយ​ខ្លួន​របស់​ ចំណេះ ផ្ទាល់​ប្រឹង​ប្រែង​ធ្វើ​កិច្ចការ​អោយ​កាន់​តែ​ល្អ​ជាង​មុន ដើម្បី​យក​ឈ្នះ​លើ​ពាក្យ​សំដី​អវិជ្ជមាន​ទាំង​អស់​នោះ។ កុំ​អនុញ្ញាតិ​អោយ​ការ​រិះគន់ និង​ពាក្យ​សំដី​អវិជ្ជមាន​របស់​មនុស្ស​ទាំង​អស់​នោះ មក​បំផ្លាញ​ដល់​កម្លាំង​ចិត្ត និង​បន្ទាប​ដល់​តម្លៃ​របស់​ប្រិយមិត្ត​បាន​អោយ​សោះ ត្រូវ​ចង​ចាំ​ថា វាសនា​និង​ជីវិត​របស់​អ្នក គឺ​មាន​តែ​ខ្លួន​របស់​អ្នក​តែ​ប៉ុណ្ណោះ​ដែល​ជា​អ្នក​សម្រេច​និង​គូស​វាស។

ប្រហែល​អាច​មាន​ប្រិយមិត្ត​ខ្លះ ​ចោទ​ជា​សំណួរ​ឡើង​មក​ថា៖ "តើ​មនុស្ស​ដែល​ច្រណែន ហើយ​និង​ស្អប់​ខ្លួន​នោះ គឺ​សម្គាល់​តាម​របៀប​ណា?" អនុញ្ញាតិ​អោយ​ ចំណេះ លើក​ជា​ឧទាហរណ៍​សាមញ្ញ​មួយ​បង្ហាញ​ជូន​ប្រិយមិត្ត។ ក្នុង​ករណី​ដែល​ប្រិយមិត្ត បាន​ធ្វើ​ការ​រៀប​រាប់​ពី​ឱកាស ​ដែល​ប្រិយមិត្ត​យល់​ថា​ជា​ឱកាស​ដ៏​ល្អ និង​កម្រ​មួយ បង្ហាញ​ប្រាប់​ដល់​មនុស្ស​ណា​ម្នាក់នោះ​ ដោយ​មិន​ទាន់​បាន​ត្រួត​ពិនិត្យ​ និង​ស្វែង​យល់​អោយ​បាន​គ្រប់​ជ្រុង​ជ្រោយ​ផង ពួក​គេ​ព្យាយាម​ហាម​ឃាត់​គំនិត​របស់​អ្នក ដោយ​ស្វ័យ​ប្រវត្ត​តែ​ម្ដង ឬ​ជួនកាល​ពួក​គេ​ព្យាយាម​គៀប​សង្កត់​ និង​បន្ទាប​បន្ថោក​នូវ​គំនិត​យោបល់​ ដែល​អ្នក​បាន​រៀបរាប់​ប្រាប់​ពួក​គេ​នោះ។ មនុស្ស​បែប​នេះ​ហើយ អាច​ជា​មនុស្ស​ដែល​ព្យាយាម​រារាំង​ផ្លូវ​របស់​អ្នក​ ហើយ​ត្រូវ​ចាំ​ថា មនុស្សប្រភេទ​នេះ តែង​តែ​មាន​លេស​គ្រប់​បែបយ៉ាង ពន្យល់​ដល់​អ្នក​ថា គំនិត​និង​សមត្ថភាព​របស់​អ្នក គឺ​ល្អ​មិន​ទាន់​គ្រប់​គ្រាន់​រហូត។

៣) មនុស្ស​​ចូល​ចិត្តនិយាយ​ច្រើន​ឥតខ្លឹមសារ

មនុស្ស​ដែល​ចូល​ចិត្ត​បបួល​ប្រិយមិត្ត​ធ្វើ​កិច្ចការ​មិន​បាន​ផ្ដល់​ជា​តម្លៃ ដោយ​ចំណាយ​ពេល​ច្រើន​ឥត​ប្រយោជន៍ ក៏​ជា​មនុស្ស​មួយ​ប្រភេទ​ដែល​ប្រិយមិត្ត​គប្បី​ជៀសវាង​ដែរ។ ប្រិយមិត្ត​របស់ ចំណេះ ​ទាំង​អស់​ប្រហែល​ជា​បាន​ដឹង​ហើយ​ថា ទ្រព្យសម្បត្តិ​ដ៏​មាន​តម្លៃ​បំផុត នៅ​ក្នុង​ជីវិត​របស់​មនុស្ស​ម្នាក់ៗ​នោះ គឺ​ជា​ពេលវេលា​នេះ​ឯង។

មនុស្ស​ដែល​ចូល​ចិត្ត​ចំណាយ​ពេល​ច្រើន​ធ្វើ​រឿង​ឥត​ប្រយោជន៍ គឺ​មាន​ច្រើន​របៀប​ និង​ច្រើន​សណ្ឋាន ហើយ​វា​គឺ​ពិត​ជា​ប្រការ​ដែល​មាន​សារៈ​សំខាន់​បំផុត ដែល​ប្រិយមិត្ត​ត្រូវ​ដឹង​ថា តើ​ខ្លួន​កំពុង​តែ​ចំណាយ​ពេល ជាមួយ​នឹង​មនុស្ស​អូសបន្លាយ​ពេល​ប្រភេទ​មួយ​ណា។ មនុស្ស​ប្រភេទ​ខ្លះ គឺ​ចូល​ចិត្ត​ចំណាយ​ពេល​និយាយ​អូស​បន្លាយឥត​ប្រយោជន៍ ហើយ​អ្វី​ដែល​ប្រិយមិត្ត​គួរ​ធ្វើ​ជាមួយ​នឹង​មនុស្ស​របៀប​នេះ គឺ​អោយ​ពួក​គេ​លើក​ឡើង​ពី​ចំណុច​សំខាន់​តែ​ម្ដង។ ចំណែក​មនុស្ស​ប្រភេទ​ខ្លះ​ទៀត ចូល​ចិត្ត​ពិភាក្សា​លើ​រឿង​ដែល​ជា​ប្រធានបទ ​ដែល​គ្មាន​ប្រយោជន៍ ដូច​ជា​ពត៌មាន​ស្ដី​ទំនាក់​ទំនង​របស់​តារា ពត៌មាន​កីឡា ឬ​ពត៌មាន​គ្រោះថ្នាក់​ចរាចរណ៍​ផ្សេងៗ ដែល​ទោះ​បី​ជា​ដឹង​ក៏​មិន​បាន​ផ្ដល់​ជា​តម្លៃ​អ្វី​ទាល់​តែ​សោះ ហើយ​អ្វី​ដែល​ប្រិយមិត្ត​គួរ​ធ្វើ​ គឺ​អោយ​ពួក​គេ​លើក​ឡើង​ពី​ចំណុច​សំខាន់​ ដែល​ពួក​គេ​ចង់​និយាយ ដូច្នេះ​ប្រិយមិត្ត​អាច​មាន​លទ្ធភាព​ត្រលប់​ទៅ​ធ្វើ​កិច្ចការ​របស់​ខ្លួន​បាន​ជា​បន្ត​ទៀត។

មនុស្ស​ដែល​ចូល​ចិត្ត​និយាយ​ ដោយ​ចំណាយ​ពេល​ឥត​ប្រយោជន៍​ភាគ​ច្រើន គឺ​មិន​បាន​ដឹង​ថា​ខ្លួន​ចំណាយ​ពេល​ច្រើន​ និង​មិន​ចេះ​ពី​របៀប​គ្រប់​គ្រង​ពេលវេលា​នោះ​ទេ ដូច្នេះ​ពេល​ខ្លះ​ពួក​គេ​គឺ​គ្មាន​ចេតនា ឬ​មិន​បាន​ដឹង​ថា ខ្លួន​គឺ​កំពុង​តែ​បង្ហិន​ពេល​វេលា​របស់​អ្នក​នោះ​ទេ។ អ្វី​ដែល​ប្រិយមិត្ត​គួរ​ធ្វើ គឺ​បង្ហាញ​ប្រាប់​ពួក​គេ​ថា អ្នក​គឺ​យល់​ពី​អ្វី​ដែល​ពួក​គេ​ចង់​និយាយ ប៉ុន្តែ​អ្នក​មាន​កិច្ចការ​សំខាន់​ជាង​នេះ​ ដែល​ត្រូវ​ធ្វើ ហើយ​អ្នក​នឹង​ត្រលប់​មក​ស្ដាប់​ពួក​គេ​នៅ​ពេល​ក្រោយ​។

៤) មនុស្ស​​ចូល​ចិត្ត​ចាយ​លុយ​ក្នុង​ហោប៉ៅ​​អ្នក

មនុស្ស​ប្រភេទ​នេះ​ ភាគច្រើន​អាច​ជា​មិត្តភក្ដ ដែល​អ្នក​សេពគប់​ជាមួយ ហើយ​នៅ​រៀង​រាល់​ពេល​ដែល​ត្រូវ​ធ្វើ​ការ​គិត​បញ្ជី​នោះ​ ពួក​គេ​គឺ​តែង​តែ​ព្យាយាម​គេចវេស ហើយ​អោយ​អ្នក​ជា​អ្នក​ចេញ​ជំនួស​ជានិច្ច។ ឬ​ជួន​កាល​ជា​មិត្ត​ភក្ដ ដែល​ចូលចិត្ត​ទិញ​នេះ ទិញ​នោះ ដោយ​ខ្ចី​ប្រាក់​របស់​អ្នក​ទៅ​ទិញ ហើយ​ធ្វើ​ជា​ភ្លេច មិន​ព្រម​សង​ត្រលប់​មក​អោយ​អ្នក​វិញ។ និយាយ​ជា​រួម​ទៅ​គឺ​ជា​មនុស្ស​ដែល​សេពគប់​អ្នក​ ដើម្បី​តែ​ប្រយោជន៍​ឬ​មើល​អ្នក​គ្រាន់​តែ​ជា​សាច់​ជ្រូក​បី​ជាន់។

អនុញ្ញាតិ​អោយ ចំណេះ បង្ហាញ​នូវ​វិធី​មួយ​ដើម្បី​ត្រួត​ពិនិត្យ​មើល​ថា មិត្ត​ភក្ដ ឬ​មនុស្ស​ដែល​អ្នក​សេពគប់​ជាមួយ​ជាមនុស្ស​ប្រភេទ​នេះ តាម​របៀប​ណា។ អ្វី​ដែល​ប្រិយមិត្ត​គួរ​ធ្វើ​នោះ​គឺ កត់​ត្រា​ការ​ចំណាយ​ផ្សេង​ៗ​របស់​ប្រិយមិត្ត​ប្រចាំ​ខែ (ក្នុង​ករណី​ដែល​ប្រិយមិត្ត​ មាន​គណនី​ធនាគារ ប្រិយមិត្ត​អាច​ បោះពុម្ភ​របាយការណ៍​ហិរញ្ញវត្ថុ​កាល​ពី​ខែ​មុន) ហើយ​ត្រួត​ពិនិត្យ​មើល​ និង​សួរ​ខ្លួន​ឯង​មួយ​សំណួរ​ថា "តើ​ប្រាក់​របស់​ខ្ញុំ​ចំណាយ​ទៅ​លើ​មនុស្ស​ណា​ខ្លះ?" ហើយ​តើ​ប្រាក់​ទាំង​នោះ ប្រិយមិត្ត​ចំណាយ​ដើម្បី​ជួយ​ដល់​ពួក​គេ ឬ​ជា​ការ​ចំណាយ​ដែល​ពួក​គេ​ស្នើ​សុំ​ប្រិយមិត្ត។

ត្រូវ​ចាំ​ថា មនុស្ស​ដែល​ចូល​ចិត្ត​ចំណាយ​ប្រាក់​របស់​អ្នក ចូល​ចិត្ត​ស្នើ​សុំ​អ្នក​អោយ​ជួយ​ដល់​ពួក​គេ ឬ​ទិញ​របស់​របរ​ណា​ដែល​ពួក​គេ​ផ្ទាល់​មិន​ជា​សូវ​ត្រូវ​ការ​ផង។ ក្នុង​ករណី​នេះ ប្រិយមិត្ត​ប្រហែល​ជា​ដឹង​ហើយ​ថា ខ្លួន​គឺ​កំពុង​តែ​មាន​ទំនាក់​ទំនង ឬ​សេពគប់​ជាមួយ​នឹង​មនុស្ស ដែល​មើល​ឃើញ​តែ​ប្រាក់ របស់​អ្នក​តែ​មួយ​មុខ​ប៉ុណ្ណោះ។

៥) មនុស្ស​ដែល​ស្ទាក់​ស្ទើរ​ ឬ​ប្រើ​អារម្មណ៍​ជ្រុល​ហួសហេតុ

មនុស្ស​ប្រភេទ​ទី​ប្រាំ ដែល​ប្រិយមិត្ត​គួរ​តែ​ជៀសវាង​សេពគប់​ជាមួយ​នោះ គឺ​ប្រភេទ​មនុស្ស​ដែល​ចូលចិត្ត​ប្រើ​អារម្មណ៍​ជ្រុល មនុស្ស​ដែល​ក្នុង​ជីវិត​ និង​ការ​គិត គឺ​ពោរពញ​ទៅ​ដោយ​បញ្ហា​មួយ​រយ​ជំពូក ហើយ​សម្លឹង​មើល​ពិភពលោក​ដោយ​សុទិដ្ឋនិយម។

អ្វី​ដែល​ប្រិយមិត្ត​គួរ​តែ​ដឹង​នោះ​គឺ មនុស្ស​ប្រភេទ​នេះ​គឺ​មាន​ច្រើន​ និង​សម្បូរ​ខ្លាំង​ណាស់​នៅ​លើ​ផែន​ដី​នេះ​ ហើយ​ចំណុច​សំខាន់​ដែល​ប្រិយមិត្ត​ត្រូវ​យល់​នោះ​គឺ កុំ​អនុញ្ញាតិ​អោយ​បញ្ហា​ និង​គំនិត​អវិជ្ជមាន​របស់​ពួក​គេ​ អាច​មាន​លទ្ធភាព​ជ្រៀត​ចូល​មក​ក្នុង​ខួរ​ក្បាល​ និង​ជីវិត​រស់​នៅ​ របស់​អ្នក​បាន​អោយ​សោះ។ បើ​ដូច្នេះ ចំណុច​ណា​ខ្លះ ដែល​ប្រិយមិត្ត​អាច​សម្គាល់​មើល​ដឹង​ថា មនុស្ស​ណា​ម្នាក់​គឺ​ជា​មនុស្ស​ប្រភេទ​នេះ?

មនុស្ស​ដែល​ស្ទាក់​ស្ទើរ និង​ជា​មនុស្ស​ប្រើ​អារម្មណ៍​ជ្រុល យើង​អាច​សម្គាល់​មើល​បាន តាម​រយៈ​អត្តចរិត​ផ្ទាល់​ខ្លួន​របស់​ពួក​គេ​បាន ដោយ​ពួក​គេ​គឺ​ជា​មនុស្ស​ដែល​ ទម្រើស​ខ្លាំង​ណាស់។ មនុស្ស​បែប​នេះ​ សូម្បី​តែ​សម្លៀក​បំពាក់ ការ​សន្ទនា ឬ​មនុស្ស​ដែល​ខ្លួន​ស្រលាញ់ ក៏​ពួក​គេ​ត្រូវ​ត្រួត​ពិនិត្យ និង​ជ្រើសរើស​ ទាល់​តែ​គ្រប់​លក្ខ័ណ្ឌ​ដែរ ទើប​ពួក​គេ​សម្រេច​ចិត្ត​ថា​ជ្រើស​យក​។ និយាយ​អោយ​ខ្លី ងាយ​ស្រួល​យល់ គឺ​ជា​មនុស្ស​ដែល​អ្វី​ៗ ត្រូវ​តែ Perfect ដូច​ទៅ​នឹង​ការ​គិត​របស់​ពួក​គេ។

តាម​ពិត​ទៅ មនុស្ស​ប្រភេទ​នេះ អាច​ផ្ដល់​ជា​ជំនួយ​ផ្នែក​គំនិត សម្រាប់​ការ​រស់​នៅ​របស់​ប្រិយមិត្ត​បាន ក៏​ប៉ុន្តែ​ប្រិយមិត្ត​មិន​គួរ​ចំណាយ​ពេល​ជាមួយ​នឹង ពួក​គេ​ច្រើន​ខ្លាំង​ពេក​នោះ​ទេ ប្រសិន​បើ​ប្រិយមិត្ត​មាន​គោលដៅ​ធំ នៅ​ក្នុង​ជីវិត​ដែល​អ្នក​ចង់​សម្រេច​អោយ​បាន។

៦) មនុស្ស​សំបូរ​លេស​ដោះ​សារ​

មនុស្ស​ប្រភេទ​នេះ ប្រិយមិត្ត​មិន​គួរ​សេពគប់​ជាមួយ​នោះ​ទេ ព្រោះ​ថា​ប្រសិន​បើ​មាន​បញ្ហា​មិន​ល្អ​ណា​មួយ​ ដែល​កើត​ឡើង​នៅ​ក្នុង​ជីវិត​របស់​ពួក​គេ ពួក​គេ​នឹង​ព្យាយាម​រក​លេស​ដោះ​សារ​គ្រប់​បែប​យ៉ាង ហើយ​បន្ទោស​ទៅ​លើ​រឿង​រ៉ាវ​ ឬ​ព្រឹត្តិការណ៍​ណា​មួយ ទើប​បាន​ជា​បណ្ដាល​អោយ​ជីវិត​របស់​ពួក​គេ​ ត្រូវ​ជួប​ប្រទះ​នឹង​រឿង​បែប​នេះ។ ទាំង​ដែល​ការ​ពិត​ទៅ អ្វី​ៗ​ដែល​កើត​ឡើង​នៅ​ក្នុង​ជីវិត​របស់​មនុស្ស​ម្នាក់ៗ ៩៩% គឺ​ជា​គំនិត និង​សកម្មភាព​ដែល​ពួកគេ​គឺ​ជា​អ្នក​ជ្រើសរើស​ដោយ​ខ្លួន​ឯង។

នៅ​ពេល​ជួប​ប្រទះ​បញ្ហា​នៅ​ក្នុង​ជីវិត​រស់​នៅ ដោយ​ជំនួស​អោយ​ការ​ស្វែង​រក​ដំណោះ​ស្រាយ ពួក​គេ​បែរ​ជា​ព្យាយាម​បន្ទោស​អ្នក​ដទៃ។ ហើយ​ប្រសិន​បើ​អ្នក​ចូល​ចិត្ត​ចំណាយ​ពេល​ជា​មួយ​នឹង​ពួក​គេ អ្នក​នឹង​មាន​ទំនោរ គិត​ដូច​ជា​ពួក​គេ​ដែរ ហើយ​ពួក​គេ​នឹង​ផ្ដល់​យោបល់​អវិជ្ជមាន ប្រាប់​ដល់​អ្នក​ថា បញ្ហា​របស់​អ្នក​គឺ​មិន​មែន​ជាកំហុស​របស់​អ្នក​នោះ​ទេ វា​គឺ​ដោយ​សារ​តែ​ហេតុ​ផល​បែប​នេះ ឬ​បែប​នោះ​ផ្សេង​ទៅ​វិញ។

នៅ​ពេល​ដែល​អ្នក​ដឹង​ខ្លួន​ថា ខ្លួន​ឯង​គឺ​កំពុង​តែ​សេព​គប់​ជាមួយ​នឹង​មនុស្ស​ប្រភេទ​នេះ អ្នក​អាច​ធ្វើ​ការ​ណែនាំ​ប្រាប់​ពួក​គេ អោយ​ផ្លាស់​ប្ដូរ​នូវ​ការ​គិត​របៀប​នេះ​ចេញ ដោយ​ជំនួស​ដោយ​ការ​ស្វែង​រក​ដំណោះ​ស្រាយ​ដ៏​សាក​សម​វិញ។ ប៉ុន្តែ​ប្រសិន​បើ​អ្នក​សង្កេត​ឃើញ​ថា ពួក​គេ​គ្មាន​ទំនោរ​នៅ​ក្នុង​ការ​ផ្លាស់​ប្ដូរ​ការ​គិត​បែប​នេះ​ចេញ​ទេ ​អ្នក​គួរ​ព្យាយាម​កាត់​បន្ថយ​ការ​ចំណាយ​ពេល​ជាមួយ​នឹង​ពួក​គេ​បាន។

ដៃគូផ្សព្វផ្សាយ៖ ចំណេះ

ឃ្លាំងគំនិត យល់ដឹង