មហាសេដ្ឋី ១០ រូបមានដាច់គេនៅអាសុីក្នុងឆ្នាំ ២០១៧

,

បុគ្គល​ជោគជ័យ​រូប​ណា ដែល​ជា​មនុស្ស​ដែល​មាន​ទ្រព្យ​សម្បត្តិ​ស្ដុកស្ដម​បំផុត​ក្នុង​ទ្វីប​អាស៊ី ប្រចាំ​ឆ្នាំ​២០១៧​នេះ? តោះ​មក​តាម​ដាន​ និង​ធ្វើ​ការ​ស្វែង​យល់​ពី​បុគ្គល​ជោគជ័យ​ទាំង​អស់​នោះ​ខាង​ក្រោម៖

បញ្ជាក់៖ ទិន្នន័យ​ទាំង​ឡាយ​ដែល​ចុះ​ផ្សាយ​ក្នុង​អត្ថបទ​មួយ​នេះ ត្រូវ​បាន​ដក​ស្រង់​ដោយ​ផ្ទាល់​ពី គេហទំព័រ Forbes នឹង​គិត​ត្រឹម​ខែ​តុលា​ឆ្នាំ​២០១៧។

១០) លោក​ស្រី Yang Huiyan (ទ្រព្យ​សម្បត្តិ​សរុប ២០,៤ ពាន់​លាន​ដុល្លា)

លោក​ស្រី​ Yang គឺ​ជា​សហគ្រិន​ និង​ជា​អ្នក​វិនិយោគ​សញ្ជាតិ​ចិន ហើយ​ក៏​ជា​អ្នក​ដែល​មាន​ភាគ​ហ៊ុន​ច្រើន​បំផុត​ ក្នុង​ក្រុមហ៊ុន Country Garden Holdings។ ឪពុក​របស់​លោក​ស្រី បាន​ធ្វើ​ការ​ផ្ទេរ​នូវ​ភាគហ៊ុន​ប្រមាណ ៧០% របស់​ក្រុមហ៊ុន​អោយ​មក​លោក​ស្រី មុន​ពេល​ក្រុមហ៊ុន​មួយ​នេះ​ប្រកាស​ចូល​ទីផ្សារ​ភាគហ៊ុន​ កាល​ពី​ឆ្នាំ​២០០៧​កន្លង​ទៅ។

លោក​ស្រី​ Yang គឺ​ជា​ស្ដ្រី​ដែល​មាន​ទ្រព្យ​សម្បត្តិ​ច្រើន​ជាង​គេ​ប្រចាំ​ទ្វីប​អាស៊ី និង​ជា​បេក្ខភាព​នារី​តែ​មួយ​គត់​ ដែល​មាន​ឈ្មោះ​នៅ​ក្នុង​បញ្ជី​នេះ។ ទ្រព្យ​សម្បត្តិ​របស់​លោក​ស្រី​ ត្រូវ​បាន​ប៉ាន​ប្រមាណ​ថា​មាន​ចំនួន​ប្រហែល ២០,៤ ពាន់​លាន​ដុល្លា នឹង​មាន​សន្ទុះ​កើន​ឡើង​យ៉ាង​ខ្លាំង​ក្លា​ក្នុង​រយៈពេល​ប៉ុន្មាន​ឆ្នាំ​កន្លង​មក​នេះ។

៩) លោក Wang Wei (ទ្រព្យ​សម្បត្តិ​សរុប ២១,១ ពាន់​លាន​ដុល្លា)

លោក​ Wang Wei គឺ​ជា​ពាណិជ្ជករ​ជនជាតិ​ចិន និង​ជា​អគ្គនាយក​ក្រុមហ៊ុន SF Express ដែល​ជា​ក្រុមហ៊ុន​ផ្គត់​ផ្គង់​សេវាកម្ម​ដឹក​ជញ្ជូន​នៅ​ក្នុង​ប្រទេស​ចិន។ បច្ចុប្បន្ន​លោក Wang រស់​នៅ​ក្នុង​ទីក្រុង​ហុងកុង ហើយ​ត្រូវ​បាន​ប៉ាន​ស្មាន​ថា​មាន​ទ្រព្យ​សម្បត្តិ​សរុប​ចំនួន ២១,១ ពាន់​លាន​ដុល្លា។

ចំណែក​ក្រុមហ៊ុន SF Express របស់​លោក​ត្រូវ​បាន​បង្កើត​ឡើង​នៅ​ក្នុង​ឆ្នាំ ១៩៩៣ ហើយ​បច្ចុប្បន្ន​ជា​ក្រុមហ៊ុន​ដឹក​ជញ្ជូន​ធំ​លំដាប់​ទីពីរ នៅ​ក្នុង​ប្រទេស​ចិន តាម​ពី​ក្រោយ​ក្រុមហ៊ុន China Post។

៨) លោក Masayoshi Son (ទ្រព្យ​សម្បត្តិ​សរុប ២២,៦ ពាន់​លាន​ដុល្លា)

លោក Masayoshi Son គឺ​ជា​ពាណិជ្ជករ​ជនជាតិ​ជប៉ុន ជា​ស្ថាបនិក​ និង​ជា​នាយកប្រតិបត្តិ​ក្រុមហ៊ុន SoftBank Mobile និង​ជា​អគ្គនាយក​សាជីវកម្ម Sprint Corporation។ លោក​ក៏​ធ្លាប់​មាន​បទពិសោធន៍​ជួប​នូវ​ការ​បរាជ័យ​ជា​ច្រើន​ផង​ដែរ ក្នុង​នោះ​ការ​បរាជ័យ​ដ៏​ធំ​បំផុត​របស់​លោក​គឺ ការ​ខាត​បង់​ទ្រព្យ​សម្បត្តិ​សរុប​ប្រមាណ ៧០ពាន់​លាន​ដុល្លា ក្រោយ​វិបត្តិ​សេដ្ឋកិច្ច​អ៊ីនធើណេត (Dot Com) កាល​ពី​ឆ្នាំ ២០០០ កន្លង​មក។ ជា​ការ​ពិត ការ​បាត់​បង់​ទ្រព្យ​សម្បត្តិ​ដ៏​មហាសាល​របស់​លោក​នេះ គឺ​ជាប់​ក្នុង​កំណត់​ត្រាដែល​ច្រើន​ជាង​គេ​ក្នុង​ប្រវត្តិសាស្ដ្រ។

បច្ចុប្បន្ន​លោក Masayoshi គឺ​ជា​បុគ្គល​ដែល​មាន​ទ្រព្យ​សម្បត្តិ​ស្ដុកស្ដម​ជាង​គេ​នៅ​ក្នុង​ប្រទេស​ជប៉ុន និង​ជាប់​ចំណាត់​ថ្នាក់​លេខ​៨ នៅ​ក្នុង​ទ្វីប​អាស៊ី។ ទ្រព្យ​សម្បត្តិ​សរុប​របស់​លោក​ត្រូវ​បាន​ប៉ាន​ប្រមាណ​ថា​ មាន​ចំនួន​ស្មើ​នឹង ២២,៦ ពាន់​លាន​ដុល្លា។

៧) លោក Lee Shau-Kee (ទ្រព្យ​សម្បត្តិ​សរុប ២៨,៧ ពាន់​លាន​ដុល្លា)

លោក Lee Shau-Kee គឺ​ជា​សេដ្ឋី​អចលនទ្រព្យ​ប្រចាំ​ទីក្រុង​ហុងកុង និង​ជា​ម្ចាស់​ភាគហ៊ុន​ច្រើន​បំផុត​របស់​ក្រុមហ៊ុន Henderson Land Development។ HLD គឺ​ជា​បណ្ដុំ​នៃ​ក្រុមហ៊ុន​ជា​ច្រើន​ច្របាច់​បញ្ចូល​គ្នា ដែល​ក្នុង​នោះ​មាន​ដូច​ជាក្រុមហ៊ុន​សំណង់​អគារ សណ្ឋាគារ ភោជនីយដ្ឋាន និង​ជា​ក្រុមហ៊ុន​ផ្គត់​ផ្គង់​សេវាកម្ម​អ៊ីនធើណេត។

លោក​ Lee បាន​កើត​នឹង​ធំ​ដឹង​ក្ដី​នៅ​ក្នុង​គ្រួសារ​ក្រីក្រ​បំផុត​មួយ នៅ​ក្នុង​ប្រទេស​ចិន ហើយ​សូម្បី​តែ​អាហារ​បរិភោគ​ ក៏​គ្រួសារ​លោក​មិន​អាច​ផ្គត់​ផ្គង់​អោយ​លោក​បាន​គ្រប់​គ្រាន់​ដែរ។ លោក​ធ្លាប់​បាន​និយាយថា សមាជិក​នៅ​ក្នុង​ក្រុមគ្រួសារ​របស់​លោក អាច​មាន​ឱកាស​បរិភោគ​ត្រី និង​សាច់​បាន​ត្រឹម​តែ​ម្ដង ឬ​ពីរ​ដង​ប៉ុណ្ណោះ​ក្នុង​ពេល​មួយ​ខែ។

សព្វថ្ងៃ​នេះ​ទ្រព្យ​សម្បត្តិ​សរុប​របស់​លោក​ Lee Shau-Kee ត្រូវ​បាន​ប៉ាន​ប្រមាណ​ថា​មាន​ចំនួន ២៨,៧ ពាន់​លាន​ដុល្លា ដែល​ធ្វើ​អោយ​រូប​លោក​ជា​បុគ្គល​ដែល​មាន​ទ្រព្យ​សម្បត្តិ​ស្ដុកស្ដម​បំផុត ក្នុង​ចំណោម​សេដ្ឋី​ផ្សេងៗ​ទៀត នៅ​ក្នុង​ប្រទេស​ចិន។

៦) លោក Wang Jianlin (ទ្រព្យ​សម្បត្តិ​សរុប ២៩,៦ ពាន់​លាន​ដុល្លា)

លោក Wang Jianlin គឺ​ជា​កំពូល​ពាណិជ្ជករ អ្នក​វិនិយោគ និង​ជា​សប្បុរស​ជន​មួយ​រូប​ផង​ដែរ។ គាត់​ជា​ស្ថាបនិក​ក្រុមហ៊ុន Dalian Wanda Group ដែល​ជា​ក្រុមហ៊ុន​អភិវឌ្ឍន៍​វិស័យ​អចលនទ្រព្យ​ធំ​ជាង​គេ​នៅ​ក្នុង​ប្រទេស​ចិន។ DWG ក៏​ជា​ក្រុមហ៊ុន​ដែល​មាន​រោង​ភាពយន្ដ​ធំ​ជាង​គេ​បំផុត​ផង​ដែរ​ នៅ​ក្នុង​ប្រទេស​ចិន។

លោក​ Wang ធ្លាប់​បាន​ចូល​បម្រើ​ក្នុង​ជួរ​កង​ទ័ព​អស់​រយៈ​ពេល ១៦​ឆ្នាំ ហើយ​នៅ​ក្នុង​ឆ្នាំ ១៩៩២ លោក​បាន​ក្លាយ​ជា​អគ្គនាយក​ក្រុមហ៊ុន Dalian Wanda Group ដោយ​ពេល​នោះ​លោក​មាន​វ័យ​ត្រឹម ៣៧​ឆ្នាំ​ប៉ុណ្ណោះ។

ទ្រព្យ​សម្បត្តិ​សរុប​របស់​លោក Wang ត្រូវ​បាន​ប៉ាន​ស្មាន​ថា​មាន​ចំនួន ២៩,៦ ពាន់​លាន​ដុល្លា ក្នុង​ខណៈ​ពេល​ចេញ​ផ្សាយ​របស់​អត្ថបទ​នេះ។

៥) លោក Li-Ka Shing (ទ្រព្យ​សម្បត្តិ​សរុប ៣៣,៩ ពាន់​លាន​ដុល្លា)

លោក​ Li-Ka Shing គឺ​ជា​សេដ្ឋី​ដែល​មាន​ជាង​គេ​បំផុត​នៅ​ក្នុង​ទីក្រុង​ហុងកុង និង​ជា​បុគ្គល​ដែល​មាន​ទ្រព្យ​សម្បត្តិ​មហាសាល​ក្នុង​ចំណោម​សេដ្ឋី​ល្បីៗ​ដទៃ​ទៀត​នៅ​អាស៊ី ដែល​ទ្រព្យ​សម្បត្តិ​សរុប​របស់​លោក ត្រូវ​បាន​ប៉ាន់​ប្រមាណ​ថា​មាន​ចំនួន​ស្មើ​នឹង ៣៣,៩ ពាន់​លាន​ដុល្លា។

លោក​ Shing គឺ​ជា​ពាណិជ្ជករ សប្បុរសជន​ និង​ជា​វិនិយោគិន​មួយ​រូប​ផងដែរ។ បច្ចុប្បន្ន​លោក​មាន​តួនាទី​ជា​អគ្គនាយក​ក្រុមហ៊ុន CK Hutchison Holdings ដែល​ជា​ក្រុមហ៊ុន​វិនិយោគ​លើ​កំពង់​ផែ​នាំ​មុខ​គេ ដែល​អភិវឌ្ឍន៍​និង​ដំណើរ​ការ​នៅ​ទូទាំង​ពិភពលោក។ លោក​ក៏​ជា​ម្ចាស់​ភាគហ៊ុន​ដ៏​ធំ​របស់​ក្រុមហ៊ុន​លក់​ផលិតផល​គ្រឿង​សម្អាង នៅ​អាស៊ី និង​អ៊ឺរ៉ុប​ផង​ដែរ។

៤) លោក Mukesh Ambani (ទ្រព្យ​សម្បត្តិ​សរុប ៣៤,៩ ពាន់​លាន​ដុល្លា)

លោក Mukesh Ambani គឺ​ជា​ពាណិជ្ជករ​ជនជាតិ​ឥណ្ឌា ហើយ​បច្ចុប្បន្ន​លោក​មាន​តួនាទី​ជា​អគ្គនាយក​ និង​ជា​ម្ចាស់​ភាគលាភ​ភាគ​ច្រើន​របស់​ក្រុមហ៊ុន Reliance Industries Limited។ ​ក្រុមហ៊ុន RIL ត្រូវ​បាន​ចុះ​ផ្សាយ​នៅ​ក្នុង​បញ្ជី​ក្រុមហ៊ុន​លំដាប់​ជួរ​មុខ​ទាំង​ ៥០០ នៅ​លើ​ពិភពលោក និង​ជា​ក្រុមហ៊ុន​ដែល​មាន​តម្លៃ​ខ្ពស់​ជាង​គេ​នៅ​លើ​ទីផ្សារ​ នេះ​បើ​ប្រៀប​ធៀប​ជាមួយ​នឹង​ក្រុមហ៊ុន​ដទៃ​ទៀត នៅ​ក្នុង​ប្រទេស​ឥណ្ឌា។

ដោយ​សារ​មូល​ហេតុ​នេះ​ ដែល​បាន​ជួយ​អោយ​លោក Mukesh បាន​ជាប់​ឈ្មោះ​នៅ​ក្នុង​បញ្ជី​ពាណិជ្ជករ​ដែល​មាន​ទ្រព្យ​សម្បត្តិ​ស្ដុកស្ដម​បំផុត​នៅ​អាស៊ី ដែល​បច្ចុប្បន្ន​លោក​មាន​ទ្រព្យ​សម្បត្តិ​សរុប​ចំនួន​ប្រមាណ ៣៥ ពាន់​លាន​ដុល្លា។

៣) លោក Ma Hueteng (ទ្រព្យ​សម្បត្តិ​សរុប ៣៧,៩ ពាន់​លាន​ដុល្លា)

លោក Ma Hueteng គឺ​ជា​សហគ្រិន​ផ្នែក​ពត៌មាន​វិទ្យា​ជនជាតិ​ចិន។ លោក​គឺ​ជា​ស្ថាបនិក អគ្គនាយក និង​នាយកប្រតិបត្តិ​របស់​ក្រុមហ៊ុន Tencent ដែល​ជា​ក្រុមហ៊ុន​អ៊ីនធើណេត​ដ៏​ធំបំផុត នៅ​ក្នុង​ប្រទេស​ចិន។ ក្រុមហ៊ុន​ Tencent នេះ​ក៏​ជា​ក្រុមហ៊ុន​ដែល​គ្រប់​គ្រង​សេវាកម្ម​ផ្ញើរ​សារ​ទូរស័ព្ទ​ធំ​ជាង​គេ​ នៅ​ក្នុង​ប្រទេស​ចិន​ផងដែរ។

ក្នុង​រយៈ​ពេល​ប៉ុន្មាន​ឆ្នាំ​ចុង​ក្រោយ​នេះ លោក Hueteng ត្រូវ​បាន​ចុះ​ផ្សាយ​ពីរ​ដង​នៅ​លើ​ក្នុង​ទស្សនាវដ្ដី Time ថា​ជា​បុគ្គលដែល​មាន​ឥទ្ធិពល​បំផុត​នៅ​លើ​ពិភពលោក ហើយ​បច្ចុប្បន្ន​លោក​ជា​អ្នក​ដែល​មាន​ទ្រព្យ​សម្បត្តិ​ស្ដុកស្ដម​បំផុត​ទីបី ទាំង​នៅ​ក្នុង​ប្រទេស​ចិន ក៏​ដូច​ជា​នៅ​អាស៊ី។

ទ្រព្យ​សម្បត្តិ​សរុប​របស់​លោក ត្រូវ​បាន​ប៉ាន់​ប្រមាណ​ថា​មាន​ចំនួន ៣៧,៩ ពាន់​លាន​ដុល្លា។

២) លោក Hui Ka Yan (ទ្រព្យ​សម្បត្តិ​សរុប ៣៨,១ ពាន់​លាន​ដុល្លា)

លោក Hui Ka Yan គឺ​ជា​ពាណិជ្ជករសញ្ជាតិ​ចិន អគ្គនាយក និង​ជា​ម្ចាស់​ភាគហ៊ុន​ភាគ​ច្រើន​របស់​ក្រុមហ៊ុន Evergrande Group ដែល​ជា​ក្រុមហ៊ុន​អចលនទ្រព្យ​នៅ​ក្នុង​ប្រទេស​ចិន។ ជា​ធម្មតា​លោក​ត្រូវ​បាន​គេ​ស្គាល់​ថា​ជា Donald Trump របស់​ប្រទេស​ចិន។ លោក​ធ្លាប់​ជា​មនុស្ស​ដែល​មាន​ទ្រព្យ​សម្បត្តិ​ច្រើន​បំផុត​ទី​មួយ​នៅ​អាស៊ី ជាមួយ​នឹង​ទ្រព្យ​សម្បត្តិ​សរុប​ប្រហែល ៣៨,១ ពាន់​លាន​ដុល្លា រហូត​ទាល់​តែ​ថ្មីៗ​នេះ​ ត្រូវ​បាន​យក​ឈ្នះ​ដោយ​បុគ្គល​មួយ​រូប​ ដែល​នៅ​លេខ​រៀង​បន្ទាប់​ខាង​ក្រោម​នេះ។

១) លោក Jack Ma (ទ្រព្យ​សម្បត្តិ​សរុប ៣៨,២ ពាន់​លាន​ដុល្លា)

 

សេដ្ឋី​ដែល​ជោគជ័យ​ ហើយ​មាន​ទ្រព្យ​សម្បត្តិ​មហាសាល​ជាង​គេ និង​ជា​មនុស្ស​ដែល​គួរ​យក​គម្រូ​តាម​នៅ​ក្នុង​បញ្ជី​នេះ គឺ​មហាសេដ្ឋី​ Jack Ma។ លោក Jack Ma បាន​ប្រឹង​ប្រែង​ធ្វើ​ការ​ ហើយ​បាន​ឡើង​ចំណាត់​ថ្នាក់​ក្នុង​បញ្ជី​នេះ​ជា​លំដាប់ ហើយ​បច្ចុប្បន្ន​លោក​ក៏​ស្ថិត​នៅ​ទី​កំពូល​គេ​ផង​ដែរ។

លោក​ Jack Ma គឺ​ជា​ពាណិជ្ជករ​ជនជាតិ​ចិន និង​ជា​ស្ថាបនិក​របស់​ក្រុមហ៊ុន Alibaba Group។ គាត់​ចាប់​ផ្ដើម​ពី​បុគ្គល​ដែល​ត្រូវ​ក្រុមហ៊ុន KFC បដិសេធ​មិន​ផ្ដល់​ការ​ងារ ត្រូវ​បដិសេធ​ដោយ​សាកលវិទ្យាល័យ Havard និង​ត្រូវ​បាន​បដិសេធ​ពី​ឱកាស​ជា​ច្រើន​ទៀត ហើយ​ចុង​ក្រោយ​ដែល​ជម្រុញ​អោយ​រូប​លោក​ចាប់​ផ្ដើម​បង្កើត​ក្រុមហ៊ុន ដែល​មាន​តម្លៃ​ថ្លៃ​បំផុត​មួយ​នៅ​ក្នុង​ប្រវត្តិ​សាស្ដ្រ​មនុស្ស​ជាតិ។

បច្ចុប្បន្ន​ទ្រព្យ​សម្បត្តិ​សរុប​របស់​លោក Ma គឺ​ត្រូវ​បាន​វាយតម្លៃ​ថា​មាន​ចំនួន ៣៨,២ ពាន់​លាន​ដុល្លា។ ពិត​ជា​មិន​ធម្មតា​ សម្រាប់​មនុស្ស​ម្នាក់​ដែល​ត្រូវ​បាន​ទាត់​ចោល​ដោយ KFC ក្នុង​ប្រទេសចិន។

ដៃគូផ្សព្វផ្សាយ៖ ចំណេះ

យល់ដឹង