ទម្លាប់​ចិញ្ចឹម​កូន​ខុស​ឆ្គង ៦​ចំណុច របស់​ឪពុក​ម្ដាយ ដែល​នឹង​ធ្វើ​ការ​រារាំង​ដល់​ភាព​ជោគជ័យ​របស់​ក្មេង​នា​ពេល​អនាគត

,

សួស្ដី​ប្រិយមិត្តទាំង​អស់​គ្នា។ តើ​ពេល​នេះ ប្រិយមិត្ត​មាន​គ្រួសារ ​ឬ​ក៏​ជា​មនុស្ស​នៅ​លីវ? ហើយ​ប្រសិន​បើ​ប្រិយមិត្ត​មាន​គ្រួសារ​រួច​ហើយ តើ​ប្រិយមិត្ត​មាន​បុត្រ ឬ​ក៏​មាន​គម្រោង​យក​បុត្រ​ដែរ​ឬ​ទេ​ ក្នុង​ពេល​នេះ? ទោះ​ជា​ប្រិយមិត្ត ស្ថិត​ក្នុង​ដំណាក់​កាល​មួយ​ណា​ក៏​ដោយ ចំណេះ សូម​ធ្វើ​ការ​ចែក​រំលែក នូវ​អត្ថបទ​ដ៏​ល្អ​មួយ​នេះ ដែល​ ចំណេះ បាន​ធ្វើ​ការ​ដក​ស្រង់​ពី គេហទំព័រ​ដ៏​ល្បី Business Insider ដែល​ធ្វើ​ការ​រៀបរាប់​នូវ "អាកប្បកិរិយា និង ទម្លាប់​ចិញ្ចឹម​កូន​ខុស​ឆ្គង ៦​ចំណុច របស់​ឪពុក​ម្ដាយ​មួយ​ចំនួន ដែល​ជា​កត្តា​រារាំង ​ធ្វើ​អោយ​ប៉ះពាល់​ដល់​ភាព​ជោគជ័យ​នៅ​ក្នុង​ជីវិត​របស់​ក្មេង" ដូច​ខាង​ក្រោម៖

១) ឪពុក​ម្ដាយ​ដែល​មាន​ទម្លាប់​ផ្ដាច់​ការ

ឪពុក​ម្ដាយ​ដែល​មាន​ទម្លាប់​ចិញ្ចឹម​កូន តាម​របៀប​ផ្ដាច់​ការ គឺ​មាន​និន្នាការ​មិន​ចូល​ចិត្ត​អោយ​កូន​បាន​បញ្ចេញ​គំនិត​ផ្ទាល់​ខ្លួន​ ឬ​អោយ​ពួក​គេ​មាន​ឱកាស​បាន​និយាយ​ពី​មូល​ហេតុ​នៃ​សកម្មភាព​ណាមួយ​របស់​ខ្លួន​នោះ​ទេ។ ទម្លាប់​របស់​ឪពុក​ម្ដាយ​ប្រភេទ​នេះ គឺ​បង្គាប់​បញ្ជា​អោយ​កូន ដាច់​ខាត​ត្រូវ​តែ​ធ្វើ​តាម​គំនិត​របស់​ខ្លួន ដោយ​មិន​ព្រម​ពន្យល់​ប្រាប់​ដល់​ក្មេង​ថា ហេតុ​អ្វី​បាន​ជា​ពួក​គេ​ត្រូវ​ធ្វើ​បែប​នោះ​ទេ។

មាន​ការ​សិក្សា​ស្រាវជ្រាវ​មួយ​បាន​បង្ហាញ​អោយ​ឃើញ​ថា នៅ​ពេល​ដែល​ឪពុក​ម្ដាយ​ប្រភេទ​នេះ ធ្វើ​ការ​ត្រួត​ពិនិត្យ​សៀវភៅ​លំហាត់​របស់​កូន វា​បាន​ធ្វើ​ការ​រារាំង​និង​ប៉ះពាល់​ជា​ខ្លាំង ដល់​ការ​សិក្សា​របស់​ក្មេង​នៅ​ឯ​សាលា។

២) ឪពុក​ម្ដាយ​ដែល​អនុញ្ញាតិ​អោយ​កូនៗ មើល​ទូរទស្សន៍​នៅ​ពេល​ពួក​គេ​មាន​វ័យ​ក្មេង​ពេក

ករណី​នេះ​គឺ​ដូច​គ្នា ទៅ​នឹង​ការ​អោយ​កូន​ ប្រើ​ឧបករណ៍​អេឡិចត្រូនិច (ដូច​ជា​ទូរស័ព្ទ​ Tablet ជាដើម​។ល។) នៅ​ពេល​ដែល​ពួក​គេ​មាន​វ័យ​ក្មេង​ខ្លាំង​ផង​ដែរ។ អ្នក​ស្រាវជ្រាវ​ជា​ច្រើន បាន​ធ្វើ​ការ​លើកឡើង​ដូច​ៗ​គ្នា​ថា ក្មេងៗ​ដែល​មើល​ទូរទស្សន៍​ច្រើន គឺ​មិន​សូវ​មាន​ពេល​ ​យក​ចិត្ត​ទុកដាក់​រៀនសូត្រ ឬ​ធ្វើ​កិច្ចការ​សាលា​អោយ​បាន​ជាប់​លាប់​នោះ​ទេ។

អ្វី​ដែល​ប្រិយមិត្ត​ជា​ឪពុក​ម្ដាយ​គួរ​តែ​ធ្វើ​នោះ​គឺ កម្រិត​ពេល​វេលា​សមរម្យ​ណាមួយ​ដើម្បី​អោយ​កូន​របស់​ខ្លួន​មើល​ទូរទស្សន៍ ឬ​ប្រើ​ឧបករណ៍​អេឡិចត្រូនិច បន្ទាប់​ពី​ពួក​គេ​បាន​ធ្វើ​កិច្ចការ​សាលារួច​ ទើប​ជា​ការ​ប្រសើរ។

៣) ឪពុកម្ដាយ​ដែល​ចូល​ចិត្ត​ស្រែក​គំហ៊ក ឬ​ប្រើ​ពាក្យ​អសុរោះ​ថា​អោយ​កូន​ជា​ញឹក​ញាប់

ការ​ស្រែក​គំហ៊ក ជេរ​ប្រមាថ ឬ​ប្រើ​ពាក្យ​អសុរោះ​ថា​អោយ​ក្មេង​ជា​ញឹកញាប់ ឬ​សូម្បី​តែ​និយាយ​អោយ​ពួក​គេ​លឺ អាច​បង្ក​ទៅ​ជា​ការ​ជះ​ឥទ្ធិពល​អវិជ្ជមាន​ជា​ច្រើន ទៅ​ដល់​ក្មេង។​ ហើយ​សម្រាប់​ក្មេង​ គឺ​វា​ធ្ងន់​ធ្ងរ​ជា​ការ​ដាក់​ទោស​ ដោយ​ការ​វាយ​ដំ​ទៅ​ទៀត។

៤) ឪពុក​ម្ដាយ​ដែល​រារាំង​កូន​ ឬ​ការ​ពារ​កូន​ជ្រុល​ហួស​ហេតុ​ខ្លាំង​ពេក

តាម​ពិត​ បើ​យើង​ពិនិត្យ​អោយ​ដិតដល់​ទៅ ឪពុក​ម្ដាយ​ប្រភេទ​នេះ គឺ​ស្រលាញ់​កូន​របស់​ខ្លួន​ខ្លាំង​ពេក​ប៉ុណ្ណោះ ប៉ុន្តែ​ពួក​គាត់​ភ្លេច​គិត​ថា ការ​រារាំង​កូន​មិន​អោយ​បាន​ស្គាល់​ពិភព​ខាង​ក្រៅ នឹង​ធ្វើ​អោយ​ក្មេង​ក្លាយ​ទៅ​ជា​មនុស្ស​ឆាប់​ងាយ​រង​គ្រោះ ពី​ព្រោះ​ពួក​គេ​មិន​បាន​ដឹង​ថា នៅ​ពិភព​ខាង​ក្រៅ​ពិត​ប្រាកដ​ជាក់​ស្ដែង អ្វីៗ​គឺ​មិន​ល្អ​ទាំង​អស់​ ដូច​នៅ​ក្នុង​សង្គម​គ្រួសារ​របស់​ពួក​គេ​នោះ​ទេ។

ម៉្យាង​ការ​រារាំង​ក្មេង​ជ្រុល​ហួស​ហេតុ​បែប​នេះ ក៏​ជា​កត្តា​ដែល​ធ្វើ​អោយ​ក្មេង​ទទួល​នូវ​អារម្មណ៍ តប់​ប្រមល់ និង​ជំងឺ​បាក់​ទឹក​ចិត្ត​ក្នុង​កម្រិត​ខ្ពស់​បាន​ថែម​ទៀត​ផង។ អ្នក​ស្រាវជ្រាវ​ជាច្រើន​ បាន​រក​ឃើញ​ថា ក្មេង​ដែល​មាន​ឪពុក​ម្ដាយ​ ស្រលាញ់​ថ្នាក់​ថ្នម​ហើយ​រារាំង​ពួក​គេ​ខ្លាំង​នោះ គឺ​មាន​និន្នាការ​ពិបាក​ក្នុង​ការ​ទទួល​យក​នូវ​គំនិត​ច្នៃ​ប្រឌិត​ថ្មីៗ ហើយ​ជា​មនុស្ស​ដែល​ស្ងៀមស្ងាត់​ និង​ខ្សោយ​ខាង​ទំនាក់​ទំនង។

៥) ឪពុក​ម្ដាយ​ដែល​គ្មាន​ក្ដី​ស្រលាញ់​និង​ការ​ថ្នាក់​ថ្នម​ចំពោះ​គ្នា

ចំណុច​នេះ បើ​និយាយ​អោយ​ងាយ​ស្ដាប់ គឺ​ចង់​សំដៅ​ទៅ​លើ​គូ​ស្វាមី​ដែល​មាន​បុត្រ​ជាមួយ​គ្នា តែ​ពួក​គាត់​ទាំង​ពីរ​ បាន​បាត់​បង់​នូវ​ក្ដី​ស្រលាញ់ និង​ការ​យក​ចិត្ត​ទុក​ដាក់​អោយ​គ្នា​ ទៅ​វិញ​ទៅ​មក។ ករណី​នេះ គឺ​កើត​មាន​ឡើង​ច្រើន​ចំពោះ គូ​ស្វាមី​ភរិយា នៅ​ក្នុង​សម័យ​បច្ចុប្បន្ន​នេះ មូលហេតុគឺ​អាច​បណ្ដាល​មក​ពី​កត្តា​ជា​ច្រើន ប៉ុន្តែ​ក្នុង​នោះ​មូល​ហេតុ​សំខាន់​មួយ​គឺ​អាច​ដោយ​សារ​តែ​ពួក​គាត់​ ជាប់​រវល់​ការ​ងារ​ច្រើន​ ឬ​មាន​អារម្មណ៍​ស្ដ្រេស​ពី​កន្លែង​ធ្វើ​ការ ដែល​ធ្វើ​អោយ​ក្ដី​ស្រលាញ់​ដែល​ធ្លាប់​មាន ត្រូវ​បាត់​បង់​ម្ដង​បន្តិច​ៗ។

ចំពោះ​ឪពុក​ម្ដាយ​ប្រភេទ​នេះ នឹង​ជះ​ឥទ្ធិពល​ដល់​ក្មេង ដែល​នឹង​ធ្វើ​អោយ​ពួក​គេ​ក្លាយ​ទៅ​ជា មនុស្ស​ដែល​មាន​បញ្ហា​ផ្នែក​អាកប្បកិរិយា មនុស្ស​គ្មាន​សីលធម៌ មនុស្ស​អវិជ្ជមាន​ឬ​ទុទិដ្ឋិនិយម និង​ជា​មនុស្ស​ដែល​ពិបាក​ក្នុង​ការ​បង្ហាញ​អារម្មណ៍​របស់​ខ្លួន។

៦) ឪពុក​ម្ដាយ​ដែល​ចូល​ចិត្ត​ប្រើ​អំពើ​ហិង្សា

នៅ​រៀងរាល់​ពេល​ដែល​កូន​ធ្វើ​អ្វី​មួយ​ខុស ឪពុក​ម្ដាយ​ដែល​ចូល​ចិត្ត​ដាក់​ទោស​កូន ដោយ​ការ​វាយ​ដំ​ទោះ​តិចតួច ឬ​ខ្លាំង​ក្ដី នឹង​ធ្វើ​អោយ​ក្មេង​ ក្លាយ​ទៅ​ជា​ក្មេង​ដែល​កាន់​តែ​ខូច ហើយ​ជា​ក្មេង​ដែល​កាន់​តែ​មាន​បញ្ហា ឬ​ចូល​ចិត្ត​ធ្វើ​រឿង​ដដែល​នោះ ដើម្បី​ផ្គើន​ឪពុក​ម្ដាយ​លើស​ដើម។

ការ​ប្រើ​អំពើ​ហិង្សា​នេះ​ផង​ដែរ ក៏​ជា​មូល​ហេតុ​ដែល​បណ្ដាល​អោយ​ក្មេងៗ ងាយ​នឹង​កើត​ជំងឺ​ផ្លូវ​ចិត្ត​ធ្ងន់​ធ្ងរ ហើយ​ក្លាយ​ជា​មនុស្ស​ដែល​មាន​បញ្ហា​ផ្នែក​សតិ​បញ្ញា​ថែម​ទៀត​ផង។

បន្ទាប់​ពី​បាន​អាន​នូវ​ចំណុចទាំង ៦ ដែលបាន​ធ្វើ​ការ​លើក​ឡើង​ខាង​លើ​នេះ​រួច​ហើយ​ សង្ឃឹម​ថា​ប្រិយមិត្ត​ដែល​ជា​ ឪពុកម្ដាយ ឬ​ត្រៀម​លក្ខណៈ​ធ្វើ​ជា​ឪពុក​ម្ដាយ​ទាំង​ឡាយ យក​ទៅ​ធ្វើ​ការ​ត្រិះរិះ​ពិចារណា ដើម្បី​ចិញ្ចឹម​បីបាច់​កូន​របស់​ខ្លួន​អោយ​មាន​លទ្ធភាព ​ក្លាយ​ទៅ​ជា​មនុស្ស​ល្អ និង​ជា​មនុស្ស​ដែល​ជោគជ័យ​នៅ​ក្នុង​ជីវិត​រស់​នៅ​របស់​ពួក​គេ​បាន។

ដៃគូផ្សព្វផ្សាយ៖ ចំណេះ

យល់ដឹង