សញ្ញាទាំង ១៨ បញ្ជាក់​ថាអ្នក​បាន​ជួប​គូរគ្រងពិតប្រាកដ​ហើយ

,

ជា​ធម្មតា​អ្នក​ណា​ក៏​ដោយ​តែង​តែ​មាន​ចំណុច​មួយ​ចំនួន​ ដែល​ខ្លួន​គិត​ថា​ជា​គុណសម្បត្តិ ឬ​ជា​តម្រូវ​ការ​ពី​មនុស្ស​ម្នាក់​ ​មុន​នឹង​ម្នាក់​នោះ​ក្លាយ​ទៅ​ជា​មនុស្ស​ដែល​ខ្លួន​ពេញ​ចិត្ត​បាន ក៏​ប៉ុន្តែ​ប្រសិន​បើ​អ្នក​មាន​ភាព​ក្លាហាន​បន្តិច ហើយ​សាក​កុំ​យក​ចិត្ត​ទុក​ដាក់​ជាមួយ​នឹង ចំណុច​ដែល​អ្នក​ចង់​បាន​ទាំង​នោះ ហើយ​សាក​ល្បង​បើក​បេះ​ដូង​ទទួល​យក​នូវ​ លទ្ធភាព​ដែល​មិន​រំពឹង​ទុក​មួយ​ចំនួន​វិញ អ្នក​ប្រហែល​ជា​អាច​ក្លាយ​ជា​មនុស្ស​ដែល​មាន​សំណាង​ម្នាក់​ ដែល​អាច​ស្វែង​រក​មនុស្ស​ដែល​នឹង​ត្រូវ​រួម​ដំណើរ​ជាមួយ​អ្នក​បាន​ពេញ​មួយ​ជីវិត​នេះ​បាន។

ខាងក្រោមនេះជាសញ្ញាទាំង ១៨ ​ដែលបញ្ជាក់​ថាអ្នក​បាន​ជួប​ជាមួយ​នឹង​មនុស្ស​ម្នាក់​នោះ​ហើយ៖

១) អ្នក​គ្រាន់​តែ​ដឹង ហើយ​មាន​អារម្មណ៍​ថា អ្នក​បាន​ជួប​នឹង​ម្នាក់​នោះ​ហើយ​

ជួន​កាល​អារម្មណ៍​ និង​កំលាំង​អាថ៍​កំបាំង​អ្វី​មួយ​ដែល​ស្ថិត​នៅ​ក្នុង​ខ្លួន​អ្នក ​បាន​ប្រាប់​អ្នក​ថា​ គឺ​មនុស្ស​ម្នាក់​នេះ​ហើយ​ដែល​អ្នក​នឹង​ត្រូវ​ប្រើ​ពេល​វេលា​ដែល​នៅ​សល់​ លើ​លោក​នេះ​ជាមួយ​នឹង​គេ។ វា​ប្រៀប​បី​ដូច​ជា​មាន​អ្វី​មួយ​ដែល​មក​បណ្ដាល​ចិត្ត​របស់​អ្នក​ អោយ​លះ​បង់​អ្វីៗ​គ្រប់​បែប​យ៉ាង ដែល​អ្នក​ធ្លាប់​រំពឹង​ទុក​ពី​មុន ហើយ​ព្រម​ចុះ​ចាញ់​គ្រប់​បែប​យ៉ាង​ដើម្បី​គេ​បាន​។

២) អ្នក​ធ្លាប់​ជ្រួស​ផ្លូវ​គ្នា ឬ​ជួប​គ្នា​ដោយ​ចៃដន្យ​

មនុស្ស​ដែល​ជា​គូ​ជីវិត​ជា​មួយ​គ្នា មាន​ពេល​ខ្លះ​ធ្លាប់​ជួប​គ្នា​ដោយ​ចៃដន្យ កាល​ពី​ពេល​មុនៗ​តែ​គ្មាន​ភាគី​ណា​ម្នាក់​ដែល​ចាប់​អារម្មណ៍ ប៉ុន្តែ​អ្វី​ដែល​ប្រាកដ​នោះ​គឺ អ្នក​ធ្លាប់​ស្ថិត​នៅ​ទី​កន្លែង​តែ​មួយ​ និង​ពេល​វេលា​តែ​មួយ​ជា​មួយ​នឹង​គ្នា។ អ្នក​នឹង​មិន​ដែល​ចាប់​អារម្មណ៍​នោះ​ទេ រហូត​ដល់​ពេល​វេលា​ដែល​សាក​សម​ណា​មួយ ដែល​នឹង​ចូល​មក​ដល់។

៣) អារម្មណ៍​របស់​អ្នក​ទាំង​ពីរ គឺ​ដូច​គ្នា​នៅ​ពេល​ស្ថិត​ក្នុង​ពេល​វេលា​ដែល​សាកសម

ភាគី​ទាំង​សង​ខាង​ត្រូវ​តែ​មាន​ការ​ត្រៀម​ខ្លួន​រួច​រាល់​ មុន​ពេល​ពួក​គេ​ទទួល​នូវ​អារម្មណ៍​ដែល​ហាក់​មាន​ទំនាក់​ទំនង ជាមួយ​នឹង​គ្នា។ សំរាប់​គូ​ស្នេហា​ខ្លះ​វិញ ទោះ​បី​ជា​ពួក​គេ​ធ្លាប់​ស្ថិត​នៅ​ទី​កន្លែង​តែ​មួយ ហើយ​មាន​ចំងាយ​មិន​ឆ្ងាយ​ពី​គ្នា​អស់​ពេល​ជា​ច្រើន​ឆ្នាំ​ក្ដី ក៏​ពួក​គេ​គ្មាន​ឱកាស​បាន​ជួប​គ្នា​ដោយ​ផ្ទាល់​ដែរ រហូត​ទាល់​តែ​មាន​ពេល​វេលា​ដែល​សាក​សម​ណា​មួយ។ ហើយ​នៅ​ពេល​នោះ​ដែរ អ្នក​ត្រូវ​តែ​រៀប​ចំ​ខ្លួន​ដើម្បី​ជួប​ជា​មួយ​នឹង​ មនុស្ស​ម្នាក់​នោះ។ ហើយ​ជួន​កាល​ពេល​ខ្លះ មុន​នឹង​អ្នក​បាន​ជួប​នឹង​មនុស្ស​ម្នាក់​នោះ អ្នក​ប្រហែល​ជា​ត្រូវ​ទទួល​នូវ​បទពិសោធន៍​ឈឺ​ចាប់ ឬ​ទំនាក់​ទំនង​មិន​ល្អ​កាល​ពី​អតីត​ ដែល​តម្រូវ​អោយ​អ្នក​បោះ​បង់​ និង​កែប្រែ​នូវ​លក្ខ័ណ្ឌ មិន​សម​ស្រប​មួយ​ចំនួន។ អ្នក​ចាំ​បាច់​ត្រូវ​ដឹង​ថា គ្មាន​នរណា​អាច​ដឹង​ទុក​មុន​ថា​ ពេល​ណា​ទើប​ខ្លួន​បាន​ជួប​នឹង​ដៃ​គូ​ជីវិត​ពិត​នោះ​ទេ ក៏​ប៉ុន្តែ​ពេល​វេលា​ដែល​សាក​សម​នោះ​គឺ​ពិត​ជា​មាន នៅ​ក្នុង​ជីវិត​មនុស្ស​ម្នាក់​ៗ អ្វី​ដែល​អ្នក​អាច​ធ្វើ​បាន គឺ​ត្រៀម​ខ្លួន​អោយ​បាន​ល្អ​ដើម្បី​ជួប​នឹង​គេ​ នោះ​ហើយ​គឺ​ជា​រឿង​ដែល​ប្រសើរ​បំផុត។

៤) ពេល​នៅ​ជា​មួយ​នឹង​មនុស្ស​ម្នាក់​នោះ​ អ្នក​ទទួល​បាន​នូវ​អារម្មណ៍​សន្តិភាព​បំផុត

ការ​ស្ថិត​នៅ​ស្ងៀម​ស្ងាត់​ជាមួយ​នឹង​គ្នា គឺ​ជា​រឿង​ដែល​ធ្វើ​អោយ​អ្នក​មាន​ក្ដី​សុខ​បំផុត វា​ហាក់​បី​ដូច​ជា​ការ​ស្ថិត​នៅ​ក្រោម​ភួយ​ដ៏​កក់​ក្ដៅ​ នា​យប់​ដ៏​សែន​ត្រជាក់​ដូច្នោះ​ដែរ។ ទោះ​បី​ជា​អ្នក​អាន​សៀវភៅ​ នៅ​ក្នុង​បន្ទប់​តែ​មួយ​ ឬ បើកបរ​នៅ​ក្នុង​រថ​យន្ត​តែ​មួយ​ជាមួយ​នឹង​គ្នា អ្នក​ទាំង​ពីរ​គឺ​ពិត​ជា​ទទួល​បាន​នូវ​អារម្មណ៍​កក់​ក្ដៅ និង​សន្តិ​ភាព។

៥) អ្នក​ហាក់​ស្ដាប់​លឺ​ពី​គំនិត​របស់​ភាគី​ម្ខាង​ទៀត

រវាង​មនុស្ស​ដែល​ជា​ដៃ​គូ​ពិត​ជា​មួយ​នឹង​គ្នា វា​ហាក់​ដូច​ជា​មាន​មនោសញ្ចេតនា​យ៉ាង​ជ្រាល​ជ្រៅ​ នៅ​ក្នុង​ទំនាក់​ទំនង​របស់​អ្នក​ទាំង​ពីរ ដែល​ភាគី​ម្ខាង​អាច​មាន​អារម្មណ៍​ដឹង​ជា​មុន និង​ហាក់​ស្ដាប់​លឺ​ពី​អ្វី ដែល​ភាគី​ម្ខាង​ទៀត​កំពុង​តែ​គិត ទោះ​បី​ជា​វា​មិន​ត្រូវ​បាន​និយាយ​ចេញ​មក​ខាង​ក្រៅ​ក៏​ដោយ។

៦) អ្នក​មាន​អារម្មណ៍​ឈឺ​ចាប់​ នៅ​ពេល​មនុស្ស​ម្នាក់​នោះ​ឈឺ​ចាប់

អ្នក​យល់​ពី​ចិត្ត​គ្នា​ទៅ​វិញ​ទៅ​មក ហើយ​យល់​ពី​អារម្មណ៍​របស់​គ្នា​ច្បាស់ ដោយ​គ្រាន់​តែ​អ្នក​បាន​ឃើញ​ពី​ទឹក​មុខ​របស់​ភាគី​ម្ខាង​ទៀត​ភ្លាម អ្នក​អាច​យល់​និង​ដឹង​បាន​ភ្លាម​ថា មាន​រឿង​អ្វី​ខ្លះ​ដែល​កើតឡើង​ចំពោះ​គាត់​ក្នុង​ថ្ងៃ​នេះ ដោយ​មិន​ចាំ​បាច់​សួរ។ អ្នក​យល់​ពី​អារម្មណ៍​ស្ទើរ​តែ​គ្រប់​យ៉ាង​របស់​ដៃគូ ទាំង​ទុក្ខសោក ការ​ព្រួយបារម្ភ ហើយ​នឹង​ក្ដី​កង្វល់ ហើយ​អ្នក​ចូល​រួម​ត្រេក​អរ ​ជាមួយ​សុភមង្គល និង​ភាព​រីក​រាយ​របស់​ដៃ​គូ​បាន​ដូច​គ្នា។

៧) អ្នក​ដឹង​ពី​ចំណុច​ខ្សោយ​គ្នា​ ហើយ​នឹង​ដឹង​ពី​ផល​ប្រយោជន៍​នៃ​ចំណុច​ខ្វះ​ខាត​ទាំង​អស់​នោះ

នេះ​គឺ​ជា​ការ​ពិតដែល​ថា ចំណុច​ខ្សោយ​របស់​មនុស្ស​យើង គឺ​ពិត​ជា​មាន​ផល​ប្រយោជន៍។ បុគ្គលិក​លក្ខណៈ​ណា​ក៏​ដោយ គឺ​តែ​ង​តែ​មាន​ទាំង​ចំណុច​វិជ្ជមាន និង​អវិជ្ជមាន​របស់​វា។ ហើយ​វា​គឺ​ពិត​ជា​កាតព្វកិច្ច​របស់​ភាគី​ទាំង​សង​ខាង​ ដែល​ត្រូវ​តែ​សម្លឹង​មើល​ពី​ចំណុច​ល្អ​របស់​បុគ្គលិក​លក្ខណៈ​ទាំង​អស់​នោះ ទោះ​បី​ជា​ពេល​ខ្លះ​វា​ហាក់​មិន​ល្អ​សំរាប់​អ្នក​ដទៃ​ក៏ដោយ។ ជាធម្មតា​ចំណុច​ខ្សោយ​ណា​ក៏​ដោយ​ គឺ​តែង​តែ​មាន​ផល​ប្រយោជន៍​ ជាឧទាហរណ៍​មនុស្ស​ដែល​រឹង​រូស គឺ​ជា​មនុស្ស​ដែល​ពូកែ​នៅ​ក្នុង​ការ​សំរេច​ចិត្ត ហើយ​មនុស្ស​ដែល​ពូកែ​ទុក​ដាក់​ជ្រុល គឺ​ជា​មនុស្ស​ដែល​តែង​តែ​មាន​ប្រាក់​សម្រាប់​តម្រូវ​ការ​ ទៅ​តាម​កាល​កំណត់។

៨) អ្នក​ទាំង​ពីរ​មាន​គោលដៅ​នៅ​ក្នុង​ជីវិត​ដូច​គ្នា

អ្នក​ទាំង​ពីរ​គឺ​មាន​លក្ខណៈ​ និង​ជំនឿដូច​គ្នាទាក់​ទង​នឹង តម្លៃ​នៃ​ភាព​ជា​មនុស្ស សីលធម៌ ហើយ​នឹង​គោល​ដៅ​នៅ​ក្នុង​ជីវិត។ អ្នក​ទាំង​ពីរ​អាច​មាន​វិធី​ផ្សេង​គ្នា នៅ​ក្នុង​ការ​សំរេច​គោល​ដៅ​ទាំង​នោះ ក៏​ប៉ុន្តែ​ចុងក្រោយ​អ្នក​ត្រូវ​ការ​លទ្ធផល​ដែល​ដូច​គ្នា។

៩) អ្នក​មិន​មាន​ការ​ភ័យ​ខ្លាច​ នៅ​ក្នុង​ការ​សន្ទនា​ពី​បញ្ហា​ជាមួយ​នឹង​គ្នា

ការ​ពិភាក្សា​ពី​បញ្ហា​នានា ​គឺ​អាច​ជា​រឿង​ដែល​ពិបាក​។ ការ​បង្ហាញ​ពី​ការ​ព្រួយ​បារម្ភ ឬ​ការ​ប៉ុនប៉ង​ធ្វើ​នូវ​ការ​សម្រេច​ចិត្ត​ណា​មួយ គឺ​សុទ្ធ​តែ​មិន​មែន​ជា​រឿង​ដែល​ងាយ​ស្រួល។ ប៉ុន្តែ​សម្រាប់​ដៃ​គូ​ជីវិត ពួក​គេ​ដឹង​យ៉ាង​ច្បាស់​ថា ប្រសិន​បើ​ពួកគេ​ចូល​រួម​នៅ​ក្នុង​ការ ពិភាក្សា​ជាមួយ​នឹង​គ្នា ពួក​គេ​ប្រាកដ​ជា​អាច​ស្វែង​រក​ដំណោះ​ស្រាយ​ដែល​ សមរម្យ​មួយ​សំរាប់​បញ្ហា​ទាំង​អស់​នោះ​បាន។

១០) អ្នក​គ្មាន​អារម្មណ៍​ទទួល​នូវ​ការ​គម្រាម​កំហែង​ណា​មួយ​ចំពោះ​ទំនាក់​ទំនង នៅ​ពេល​ភាគី​ម្ខាង​ទៀត​ត្រូវ​ការ​ពេល​វេលា​ផ្ទាល់​ខ្លួន

ទោះ​បី​ជា​ដៃ​គូ​របស់​អ្នក​មាន​សំណូម​ពរ​ ឬ​ចង់​ទៅ​ណា​មក​ណា​ជា​មួយ​នឹង​មិត្ត​ភក្ដ​របស់​គេ គឺ​អ្នក​មិន​ទទួល​នូវ​អារម្មណ៍​ខ្វាយ​ខ្វល់ ឬ​ភ័យ​ខ្លាច​ពួក​គេ​មិន​ស្មោះ​ត្រង់​ជាមួយ​នឹង​ខ្លួន​នោះ​ទេ អ្នក​ទុក​ចិត្ត ហើយ​នឹង​គោរព​ចំពោះ​តម្រូវ​ការ​នៃ​ពេល​វេលា​ផ្ទាល់​ខ្លួន​របស់​ពួក​គេ ពី​ព្រោះ​អ្នក​បាន​ដឹង​ថា​ក្រោយ​ពី​ពួក​គេ​ចំណាយ​ពេល​ជាមួយ​មិត្ត​ភក្ដ​រួច ពេល​វេលា​បន្ទាប់​ដែល​អ្នក​ទាំង​ពីរ​ស្ថិត​នៅ​ជាមួយ​គ្នា គឺ​កាន់​តែ​មាន​ភាព​ផ្អែម​ល្ហែម​និង​វិសេស​វិសាល។

១១) អ្នក​គ្មាន​អារម្មណ៍​ប្រច័ណ្ឌ

ទោះ​ជា​មាន​មិត្ត​រួម​ការ​ងារ​ដែល​ស្អាត​ ឬ​ល្អ​ជាង​រូប​អ្នក​នៅ​កន្លែង​ធ្វើ​ការ​របស់​ដៃ​គូ ក៏​អ្នក​គ្មាន​ការ​ព្រួយ​បារម្ភ ឬ​ទទួល​នូវ​ការ​គម្រាម​កំហែង​ណាមួយ ចំពោះ​ទំនាក់​ទំនង​របស់​អ្នក​ទាំង​ពីរ​ដែរ ពី​ព្រោះ​អ្នក​មាន​អារម្មណ៍​សុវត្ថិភាព ហើយ​ដឹង​យ៉ាង​ច្បាស់​ថា អ្នក​គឺ​មនុស្ស​តែ​ម្នាក់​គត់​នៅ​ក្នុង​បេះ​ដូង​របស់​ដៃ​គូ។

១២) អ្នក​គោរព​នូវ​ភាព​ខុស​ប្លែក និង គំនិត​របស់​ភាគី​ម្ខាង​ទៀត

អ្នក​ដឹង​យ៉ាង​ច្បាស់​ថា អ្នក​ទាំង​ពីរ​គឺ​មាន​គំនិត​ដែល​ជា​របស់​ខ្លួន​ឯង​រៀង​ខ្លួន ហើយ​ជារឿយ​ៗ​មនុស្ស​ពីរ​នាក់ ដែល​ជា​ដៃ​គូ​ជីវិត​ជា​មួយ​នឹង​គ្នា គឺ​មាន​អត្តចរិត និង​គំនិត​ខុសគ្នា​ ស្ទើរ​តែ ១៨០​ដឺក្រេ។ មាន​ពេល​ខ្លះ​ចំណុច​នេះ​ក៏​ជា បញ្ហា​ប្រឈម​មួយ​ដែរ ហើយ​ពេល​ខ្លះ​វា​ក៏​ជា​ពេល​វេលា ដែល​អ្នក​ត្រូវ​ធ្វើ​ការ​សម្រប​ខ្លួន ដើម្បី​អនុញ្ញាតិ​អោយ​ភាគី​ម្ខាង​ទៀត ជា​អ្នក​បំពេញ​នូវ​ចំណុច​ខ្វះ​ខាត​របស់​ខ្លួន​ដូច​គ្នា​ដែរ។ អ្នក​គឺ​នៅ​តែ​មាន​គំនិត​ដែល​ជា​របស់​ខ្លួន​ឯង ក៏​ប៉ុន្តែ​ជំនួស​អោយ​ការ​យល់​ស្រប ឬ​មិន​យល់​ស្រប អ្នក​គឺ​ទទួល​បាន​នូវ​អារម្មណ៍​ដែល​គោរព​ចំពោះ​គ្នា អ្នក​ចេះ​ស្ដាប់​ ហើយ​នឹង​ផ្ដល់​តម្លៃ​ដល់​ភាព​ខុស​ប្លែក​គ្នា​របស់​អ្នក​ទាំង​ពីរ។

១៣) អ្នក​មិន​ស្រែក​គំហក ប្រើ​ពាក្យ​អសុរស រឺ​គម្រាម​ភាគី​ម្ខាង​ទៀត​ដោយ​ការ​លែង​លះ​ជា​ដាច់​ខាត

ជា​ការ​ពិត​ណាស់​ដែល​ថា មាន​ពេល​ខ្លះ​អ្នក​គឺ​ពិត​ជា​ខឹង​ខ្លាំង ហើយ​ស្ទើរ​តែ​ទ្រាំ​មិន​បាន។ មនុស្ស​ធម្មតា​តែង​តែ​បញ្ចេញ​កំហឹង​ដោយ​ ការ​ធ្វើ​បាប​ទៅ​ដល់​អ្នក​ដែល​ធ្វើ​អោយ​ខ្លួន​ខឹង ក៏​ប៉ុន្តែ​សម្រាប់​ដៃ​គូ​ជីវិត​វិញ ពួក​គេ​មិន​ធ្វើ​អំពើ​អាក្រក់ ប្រើ​អំពើ​ហិង្សា ឬ​ធ្វើ​អោយ​ភាគី​ម្ខាង​ទៀត​ឈឺ​ចាប់​ជា​ដាច់​ខាត។

១៤) អ្នក​ព្រម​ចុះ​ចាញ់​ពី​ព្រោះ​អ្នក​ចង់​ឃើញ​មនុស្ស​ដែល​អ្នក​ស្រលាញ់​សប្បាយ​ចិត្ត

ការ​ផ្ដល់​អោយ ឬ​ព្រម​ចុះ​ចាញ់​រហូត​គឺ​មិន​ល្អ​នោះ​ទេ ទោះ​ស្ថិត​ក្នុង​កាលៈ​ទេសៈ​ណា​ក៏​ដោយ​ ក៏​ប៉ុន្តែ​សំរាប់​មនុស្ស​ដែល​ជា​ដៃ​គូ​ជីវិត​ជាមួយ​នឹង​គ្នា​វិញ ការ​ព្រម​ចុះ​ចាញ់​ ឬ​ផ្ដល់​អោយ​នូវ​អ្វី​មួយ​ គឺ​ធ្វើ​ឡើង​ក្នុង​គោល​បំណង​តែ​មួយ​ប៉ុណ្ណោះ នោះ​គឺ​ការ​ធ្វើ​អោយ​ភាគី​ម្ខាង​ទៀត​មាន​អារម្មណ៍​សប្បាយ​រីក​រាយ។

១៥) ​ពេល​អ្នក​ខុស​ អ្នក​ចេះ​សុំ​អភ័យ​ទោស

សំរាប់​មនុស្ស​ណា​ក៏​ដោយ ការ​និយាយ​ពាក្យ​ថា "ខ្ញុំ​សុំ​ទោស" ឬ​ទទួល​ស្គាល់​ថា​ខ្លួន​បាន​ធ្វើ​អោយ​មនុស្ស​ដែល​ខ្លួន​ស្រលាញ់​ ឈឺចាប់​នោះ​គឺ​ ពិត​ជា​មិន​មាន​ភាព​ងាយ​ស្រួល​នោះ​ឡើយ។ ដៃ​គូ​ជីវិត​ដឹង​យ៉ាង​ច្បាស់​ថា ពាក្យ​សំដី ឬ​កាយវិការ​របស់​ខ្លួនគឺ​ពិត​ជា​អាច​ធ្វើ​អោយ​ភាគី​ម្ខាង​ទៀត​ឈឺ​ចាប់​បាន ហើយ​ទោះ​ជា​ពួកគេ​មាន​អារម្មណ៍​ថា អ្វី​ដែល​ខ្លួន​និយាយ ឬ​ធ្វើ​នោះ​មាន​ភាព​ត្រឹម​ត្រូវ​ក៏​ដោយ តែ​ប្រសិន​បើ​វា​ធ្វើ​អោយ​ដៃគូ​របស់​ខ្លួន​ឈឺ​ចាប់​ នោះ​ពួក​គេ​ពិត​ជា​អាច​និយាយពាក្យ សុំទោស បាន​ដោយ​ងាយ​ស្រួល ពី​ព្រោះ​ពួកគេ​ពិត​ជា​មិន​ចង់​ឃើញ​មនុស្ស​ដែល​ខ្លួន​ស្រលាញ់​ ត្រូវ​ឈឺ​ចាប់​សោះ​ឡើយ។

១៦) បើ​សិន​ជា​អ្នក​អាច​កើត​ម្ដង​ទៀត អ្នក​នឹង​ជ្រើស​រើស​រៀប​ការ​ជា​មួយ​នឹង​ដៃ​គូ​របស់​ខ្លួន​ដដែល

អ្នក​ដឹង​យ៉ាង​ច្បាស់​ថា មាន​តែ​មនុស្ស​ម្នាក់​នេះ​ប៉ុណ្ណោះ ហើយ​គឺ​ត្រឹម​ម្នាក់​នេះ​ប៉ុណ្ណោះ ដែល​អ្នក​ត្រូវ​ការ។ ហើយ​បើ​ទោះ​បី​ជា​ត្រូវ​ឆ្លង​កាត់​ពេល​វេលា​ដែល​ពិបាកបែប​ណា​ក្ដី ក៏​អ្នក​នៅ​តែ​ជ្រើស​រើស​យក​ដៃ​គូ​របស់​ខ្លួន​ដដែល​ម្ដង​ទៀត​។ អ្នក​មាន​អារម្មណ៍​មាន​មោទនភាព ចំពោះ​ដៃ​គូ​របស់​ខ្លួន។

១៧) អ្នក​បំពេញ​អោយ​គ្នា​ទៅ​វិញ​ទៅ​មក

នៅ​លើ​លោក​នេះ​គ្មាន​មនុស្ស​ណា​ម្នាក់​ ដែល​កើត​មក​ហើយ​ល្អ​គ្រប់​ដប់​បាន​នោះ​ទេ ហើយ​គឺ​មាន​តែ​ដៃ​គូ​ជីវិត​របស់​អ្នក​តែ​ម្នាក់​គត់ ដែល​ជា​មនុស្ស​ដែល​អាច​បំពេញ​នូវ​ចំណុច​ខ្វះ​ខាត​ទាំង​អស់​នោះ​របស់​អ្នក​បាន។ ភាគី​ម្ខាង​អាច​ជា​មនុស្ស​ដែល​ស្ងៀម​ស្ងាត់ ចំណែក​ម្នាក់​ទៀត​ជា​មនុស្ស​ដែល​រួសរាយ​រាក់​ទាក់។ ដៃ​គូ​ជីវិត​ជា​ធម្មតា​ជា​មនុស្ស​ដែល​មាន​អត្ត​ចរិត​ខុស​គ្នា​ស្ទើរ​តែ​ ១៨០​ដឺក្រេ ហើយ​មាន​ភាព​ទាក់​ទាញ​ចំពោះ​គ្នា​ត្រង់​ចំណុច​ដែល​ខ្លួន​ខ្វះ​ខាត​ទាំង​អស់​នោះ​ឯង។

១៨) ស្ថិត​នៅ​ក្នុង​រង្វង់​ដៃ​របស់​មនុស្ស​ម្នាក់​នោះ​ នឹង​ធ្វើ​អោយ​ទុក្ខកង្វល់ ការ​ព្រួយបារម្ភ និង​រឿង​លំបាក​នៅ​ក្នុង​ចិត្ត​របស់​អ្នក​ជ្រះ​ស្រឡះ​ទៅ​បាន​ដោយ​ងាយ​ស្រួល

គ្មាន​កន្លែង​ណា​ដែល​ផ្ដល់​ភាព​កក់​ក្ដៅ​ជាង​គេ​ ក្រៅ​ពី​រង្វង់​ដៃ​របស់​មនុស្ស​សំខាន់​របស់​អ្នក​ឡើយ បន្ទាប់​ពី​អ្នក​ត្រូវ​ឆ្លង​កាត់​នូវ​បញ្ហា​នានា​នៅ​ក្នុង​ជីវិត​ និង​ការ​ងារ​របស់​អ្នក​ពេញ​មួយ​ថ្ងៃ​កន្លង​មក​ហើយ​នោះ​ទេ។ ទោះ​ជា​នៅ​កន្លែង​ការ​ងារ​របស់​អ្នក​ គឺ​ពោរ​ពេញ​ទៅ​ដោយ​បញ្ហា ឬ​រឿង​រ៉ាវ​ធំ​យ៉ាង​ណា​ក្ដី ខណៈ​ពេល​ដែល​អ្នក​នៅ​ជិត​មនុស្ស​សំខាន់ វា​ហាក់​ដូច​ជា​បាន​ធូរ​ស្រាល។ ​ហើយ​វា​ហាក់​ដូច​ជា​បាន​ផ្ដល់​នូវ​អារម្មណ៍​ដ៏​កក់​ក្ដៅ​ទៅ​ដល់​បេះ​ដូង​របស់​អ្នក នឹង​អារម្មណ៍​សន្តិភាព​សំរាប់​ផ្លូវ​ចិត្ត​របស់​អ្នក​ផងដែរ ដោយ​មិន​ចាំ​បាច់​និយាយ​អ្វី​សូម្បី​មួយ​ម៉ាត់។

ប្រភព៖ ចំណេះ

ស្នេហា